Den Mi Lenga Materno

E siman aki mi a disidí di skibi mi kolumna den mi lenga materno. Dikon? Gewon pasó mi tabatin gana. Ademas mi ta haña ‘leuk’ di ta e promé blogger di MeetCuracao.com ku ta tribi di dal un stap grandi asina. Un página di internèt tokante di Kòrsou, mester di sikiera 1 artíkulo na Papiamentu, òf no?

Siman pasá, un di mi mihó amiganan, Daniele, a hasi aña. El a puntra mi si mi tin gana i tempu, pa yud’é ku e preparashonnan pa su fiesta. Su mayornan, tanta- i tionan lo a bin serka dje riba e djasabra ei i Daniele ker a drecha ‘Tapas’ pa nan. Ami a mira e oportunidat pa eksperensiá un hasimentu di aña 100% a la makamba. ‘No offence!’

For di e djabièrnè promé, Daniele a bin buska mi pa nos bai kumpra kos. Despues di 2 ora di ‘hardcore shopping’, nos a bai kas pa nos kuminsá drecha e diferente pasapalonan.

Tabatin lo siguiente tabatin riba e menú:

Webu yená – pika bal – torta di makaroni – bruscetta ku ham – shampiòn yená – hala di galiña – sòpi di aspèrzje – pizza chikitu – bolita di melon ku ham – ‘appelflappen’ – ‘sauzijnenbroodjes’ – ‘cupcakes’ – ‘cheesecake’.

Fuera di e sòpi di aspèrzje, nos a traha tur kos ‘from scratch’ manera nan ta bisa. Te awe, mi no sa dikon mi a bin ku e plan genial aki. Mi Dios!, masha lidia nos a pasa. E ‘cupcakes’….m’a kima nan! Nan tabata pretu pretu. Daniele a bisa mi pa saka un potrèt di nan i pone riba facebook. Masha tantu komentario m’a haña riba e potrèt ei. Bou di harimentu, ami ku Daniele a disidí ku ta mihó nos traha ‘cupacakes’ nobo, pasó nos no por a duna hende e kos pretunan ei pa kome.

Djasabra a yega, tur kos tabata kla butá riba mesa. 3 or en punto tur hende a yega. Na Kòrsou, niun hende no ke habri fiesta. Akinan tur hende tabata ‘precies op tijd’ i nan a yega pareu! Mesora Daniele a pone kòfi, traha te i parti bolo. E ‘cheesecake’ tabata hopi dushi mes, pero ami a kustumbrá ku ta ora fiesta kaba, ta kanta i parti bolo. Na Hulanda e bolo, òf ‘gebak’, ta promé kos ku ta kome!

A parti e pasapalonan, i e hende nan a kome ku smak. Dor ku mi a yuda Danielle traha hopi di e pasapalonan, nan tabatin sabor un tiki diferente di loke e hendenan a kustumbrá na dje. Pero esei no a stòp nan di lembe nan dede. Kada bia ku nan a purba algu otro, nan a puntra mi ta kon mi a trah’é. Mi a haña hopi great pa wak kon Danielle su famia a saboriá e kuminda.

Riba e karchi di invitashon mi amiga a skibi ku e fiesta tabata di 15.00or pa 20.00or. Ora 19:59 or a bati Danielle su mama, Barbare, a lanta para i el a bisa e otro hendenan: “zullen we maar eens gaan rijden, mensen?” mi no ta eksagerá! Tur hende a lanta para, bisti nan yas, brasa Daniele i sali bai, rumbo pa kas.

Mi amiga tabata masha kontentu kon kosnan a kana riba dia di su fiesta. Ami a sinti mi satisfecho ku nos a logra di drecha tur e pasapalonan i kos di boka dushi nan ei, sin nos kòrta nos dede!

E parti mas ‘leuk’ di e dia ei tabata te na final. Barbara a duna ami tambe un sunchi i un brasa fuerte. El a pone su man nan riba mi skouder, wak mi den mi kara, i ku un smail di orea pa orea el a bis ami: “masha danki voor alles”.

 
Dit artikel is een gastblog, geschreven door Indra de Baerdemaker.